زجلية في مدح خير البرية : ” طَهَ ، عنْوانْ الزّينْ ” __ نور الدين حنيف

فْ غَيْبكْ ،

اتْعرّى اشْعاعْنَا يا طَهَ

ؤُ تُوبْ الدّلّْ ،

لْبسْنَا و لْبسْناهْ

…

كِيفْ ضَيْ الْـڭمْرَة

يِسْنَى ابْلا اسْناكْ

ؤُ كِيفْ عزْنَا خَاوِي ،

يلْقَى معْناهْ

…

طَيرْنا فْرَدْ اجْناحُو

علْ لعْــرَا

خُوفُو ملْ الْعلّالِي

فْ التْــرابْ دَلّاهْ

…

دلْنَا ادْلُو امْدلّي

فْ الطّينْ ابْلا مَــا

سْقَانَا اخْرَافَة ،

مَانَا … اشْكونْ عـرّاهْ

…

اعْذِيبْنا ازْلالْ

إِيلا كَفّكْ ارْوَاتْنَـــــــا

وْ اشْرَابْنا احْلالْ

عنْوانُـــو بسْم الله

…

اسْنُونكْ اشْمُوسْ

اطْرِيقْنا ابْـلا شْوارْ

فْنُونكْ هْمُوسْ

غُــــــرّة فِي لَجْبَاهْ

…

منْ ابْهاكْ

الْوجْنَة شافَـــــتْ الْوَرْدَة

لحْيَا فِيكْ سِيمَة

خُوفكْ رَبّي رَبّـاهْ

…

صلّى اللهُ اعْلِيكْ

يَا جامـــعْ الزّينْ

و الشْكُرْ عند اللّي شْدَا

حَرفْنا وْ غَنّـاهْ